महाराष्ट्र अँड गोवा बार कौन्सिलसाठी रविवारी अमरावतीत मतदान:स्थानिक उमेदवार नसण्याची पहिलीच वेळ; 2200 हून अधिक मतदार सहभागी

आज महाराष्ट्र अँड गोवा बार कौन्सिलसाठी अमरावतीत मंगळवारी मतदान होणार आहे. अमरावती वकील संघाचे २२०० हून अधिक सदस्य या प्रक्रियेत सहभागी होण्यास पात्र आहेत. यावर्षीच्या निवडणुकीत अमरावतीतून एकही स्थानिक उमेदवार नसल्याने, अकोला, यवतमाळ आणि नागपूर जिल्ह्यातील उमेदवारांचे लक्ष येथील मतदारांच्या कौलाकडे लागले आहे. मतदान प्रक्रिया जिल्हा व सत्र न्यायालयाच्या पहिल्या माळ्यावरील कक्ष क्रमांक १२६ मध्ये मंगळवारी सकाळी ९ ते सायंकाळी ६ या वेळेत पार पडेल. २५ सदस्यीय महाराष्ट्र अँड गोवा बार कौन्सिलची निवडणूक दर पाच वर्षांनी होते, परंतु सर्वोच्च न्यायालयाच्या निर्देशानुसार मतदार याद्यांच्या अद्ययावतीकरणामुळे ही निवडणूक तब्बल आठ वर्षांनी आयोजित केली जात आहे. या दरम्यानच्या काळात जुन्याच पदाधिकाऱ्यांना मुदतवाढ देण्यात आली होती. अमरावती वकील संघाच्या मतदार यादीला तीन टप्प्यांमध्ये विभागले आहे: सन १९९० पूर्वीचे वकील, सन १९९० नंतरचे वकील आणि नवीन वकील (फ्रेशर्स). या तिन्ही टप्प्यांतील मतदारांना निवडणुकीची माहिती देण्यात आली असून, ते सर्वजण मतदानात सहभागी होतील अशी अपेक्षा आहे. निवडणुकीची संपूर्ण तयारी महाराष्ट्र अँड गोवा बार कौन्सिलतर्फे केली जाते. मतपत्रिका आणि इतर आवश्यक साहित्यही त्यांच्याकडूनच पाठवले जाते. जिल्हा व सत्र न्यायालयातील अधिकारी आणि कर्मचारी वर्ग त्यांना आवश्यक ते सहकार्य पुरवत आहेत. यावर्षीच्या निवडणुकीचे एक महत्त्वाचे वैशिष्ट्य म्हणजे, पहिल्यांदाच महिलांसाठी पाच जागा अनिवार्य करण्यात आल्या आहेत. यापैकी तीन सदस्यांची निवड मतदानाद्वारे होईल, तर उर्वरित दोन सदस्यांचे नामांकन केले जाईल. याशिवाय, महिलांना सामान्य मतदारसंघातूनही निवडणूक लढवण्याची संधी आहे. अमरावतीने महाराष्ट्र अँड गोवा बार कौन्सिलला आतापर्यंत तीन अध्यक्ष दिले आहेत. यामध्ये ज्येष्ठ वकील रमेश पाध्ये (जे पुढे न्यायमूर्ती झाले), डी. आर. उर्फ आप्पासाहेब कुळकर्णी आणि अलीकडच्या काळातील ज्येष्ठ विधीज्ञ प्रदीप महल्ले यांचा समावेश आहे. अकोला जिल्ह्यातील बेरार एज्युकेशन सोसायटीचे पदाधिकारी ॲड. मोतीसिंह मोहता यांनीही अध्यक्षपद भूषवले आहे. पूर्वी सदस्य म्हणून निवडून आल्यानंतर इतर सदस्यांच्या सहमतीने अध्यक्षपदी विराजमान होण्याची प्रक्रिया होती.

from महाराष्ट्र | दिव्य मराठी https://ift.tt/TdqPJQC