शासकीय कर्करोग रुग्णालयात लवकरच पेट स्कॅन सुविधा:अधिष्ठाता डॉ. सुक्रे यांनी दिली माहिती

छत्रपती संभाजीनगर येथील शासकीय कर्करोग रुग्णालयात लवकरच 'पेट स्कॅन' सुविधा उपलब्ध होणार आहे. घाटीचे अधिष्ठाता डॉ. शिवाजी सुक्रे यांनी बुधवारी, १३ मे २०२६ रोजी रुग्णालयाच्या पाहणी दौऱ्यात ही माहिती दिली. त्यांनी प्रलंबित 'पेट स्कॅन' कक्षाचे काम तातडीने पूर्ण करण्याचे आदेश दिले आहेत, ज्यामुळे रुग्णालयाच्या सुविधांचा विस्तार होईल. सध्या रुग्णांना 'पेट स्कॅन' तपासणीसाठी खासगी रुग्णालयात मोठी रक्कम मोजावी लागते. शासकीय रुग्णालयात ही सुविधा उपलब्ध झाल्याने गरीब रुग्णांची आर्थिक पिळवणूक थांबेल आणि तपासणी सुलभ होईल, असा विश्वास डॉ. सुक्रे यांनी व्यक्त केला. यासोबतच, त्यांनी रुग्णालयात नव्याने स्थापित होणाऱ्या अत्याधुनिक 'HALCYON' किरणोपचार यंत्रसामुग्रीच्या कार्यपद्धतीची माहिती घेतली. या यंत्रणेमुळे किरणोपचार विभागातील रुग्णांची मोठी प्रतीक्षा यादी कमी होण्यास मदत होईल. रुग्णालयातील मनुष्यबळाचा अभाव दूर करण्यासाठी अधिष्ठातांनी 'स्मार्ट सर्व्हिसेस'च्या अधिकाऱ्यांशी चर्चा केली. तांत्रिक पदे कंत्राटी तत्त्वावर त्वरित भरून कामाला गती देण्याच्या सूचना त्यांनी दिल्या. तसेच, 'राष्ट्रीय आरोग्य निधी' अंतर्गत कर्करोगग्रस्तांना मिळणाऱ्या आर्थिक मदतीत येणाऱ्या तांत्रिक अडचणी दूर करण्यासाठी केंद्र सरकारच्या अधिकाऱ्यांशी संवाद साधून मार्ग काढण्यात येईल, असेही त्यांनी सांगितले. या आढावा बैठकीत इतर महत्त्वाचे निर्णय घेण्यात आले. प्रस्तावित धर्मशाळेच्या कामाची पाहणी करून बालकर्करोग विभागाच्या नूतनीकरणाचा प्रश्न मार्गी लावण्यात आला. रुग्णालयात मॉलिक्युलर लॅब उभारण्यासाठी आवश्यक यंत्रसामुग्री व जागेबाबत सविस्तर प्रस्ताव सादर करण्याचे आदेश डॉ. सोमेश निलफंट यांना देण्यात आले. या आढावा बैठकीस डॉ. अनघा वरुडकर, डॉ. आदिती लिंगायत, डॉ. ऋषिकेश खाडिलकर, डॉ. भक्ती कल्याणकर यांच्यासह विविध विभागांचे प्रमुख उपस्थित होते.

from महाराष्ट्र | दिव्य मराठी https://ift.tt/UJ0wFI4