वैजापुरात बिबट्याच्या हल्ल्यात बालक ठार:शेतात खेळताना झडप, 18 दिवसांतील दुसरा हल्ला

वैजापूर तालुक्यातील कविटखेडा परिसरात बुधवारी मध्य प्रदेशचे काही मजूर कुटुंबीयांसह कापूस वेचणी करत होते. सकाळी ११ वाजता शेतात झाडाखाली खेळत असलेल्या महेश सिद्धार्थ आखाडे (रा. बडवाणी, मध्य प्रदेश) या ९ वर्षीय बालकावर बिबट्याने झडप घातली. त्याला १५० फूट ज्वारीच्या शेतात फरफटत नेले. मोठ्या भावाने आरडाओरड केल्याने शेजारीच एका ट्रॅक्टरचालकाने ट्रॅक्टर वळवत बिबट्याने मुलाला नेलेल्या ज्वारीच्या शेतात ट्रॅक्टर घातले. तेव्हा बिबट्याने मुलाला सोडून पळ काढला. तोपर्यंत बालक गतप्राण झाले होते. १८ दिवसांत परिसरात हा बिबट्याचा मानवावर दुसरा हल्ला आहे. वैजापूर तालुक्यातील डोंगरथडी भागातील तलवाडा, लोणीसह कविटखेडा परिसरात गेल्या दीड महिन्यापासून बिबट्याची दहशत आहे. कविटखेडा शिवारात गट नंबर १३३ मध्ये गोरख काशीनाथ चव्हाण यांच्या शेतात मध्य प्रदेश राज्यातील मजूर कापूस वेचत असताना मुले झाडाखाली खेळत होती. या वेळी बिबट्याने महेशला ओढून नेले. त्याचा मोठा भाऊ आकाश याने आरडाओरडा केल्याने बाजूच्या शेतात ट्रॅक्टर होते ते आले. त्यांनी ज्वारीच्या शेतात ट्रॅक्टर फिरवले तेव्हा बिबट्याने मुलाला सोडून पळ काढला. पण तोपर्यंत महेशचा मृत्यू झाला होता. घटनेची माहिती मिळताच वन विभाग व शिऊर पोलिस ठाण्याचे कर्मचारी घटनास्थळी दाखल झाले.

from महाराष्ट्र | दिव्य मराठी https://ift.tt/rzgHfJ0