हिंगोली ते परभणी मार्गावर भीषण अपघात:भरधाव जीपच्या धडकेमध्ये एक जण ठार, जवळाबाजार शिवारातील घटना

हिंगोली ते परभणी मार्गावर जवळा बाजार शिवारामध्ये भरधाव कारच्या धडकेमध्ये एक जण ठार झाल्याची घटना शुक्रवारी ता 15 रात्री नऊ वाजण्याच्या सुमारास घडली आहे. या अपघातानंतर चालकाचे वाहनावरील नियंत्रण सुटल्याने वाहनाने एका टीनशेडला धडक दिली. या अपघातानंतर चालकाने कार जागेवर सोडून पळ काढला. याबाबत पोलिसांनी दिलेल्या माहितीनुसार हिंगोली ते परभणी मार्गावर जवळा बाजार शिवारामध्ये शुक्रवारी रात्री नऊ वाजता गुरुकृपा एजन्सी समोर (एम एच 38 AD11 22) स्कॉर्पिओ वाहन चालकाने त्याचे वाहन भरधाव वेगाने चालवले. यावेळी वाहन चालकांनी पायी जाणाऱ्या एका व्यक्तीला जोरदार धडक दिली या अपघातात सदर व्यक्ती गंभीर जखमी झाला. त्यानंतर कारचालक घाबरला. त्यामुळे त्याचे वाहनावरील नियंत्रण सुटले. यामध्ये त्यांनी रस्त्याच्या बाजूला असलेल्या एका टीन पत्राच्या शेडला धडक दिली. यामध्ये शेडचे मोठ्या प्रमाणावर नुकसान झाले आहे. या अपघातानंतर चालकाने घटनास्थळावरून पळ काढला. या अपघाताची माहिती मिळताच जवळाबाजार पोलीस चौकीचे सहाय्यक पोलीस निरीक्षक कैलास भगत, जमादार इम्रान सिद्दिकी व दिलीप नाईक यांनी घटनास्थळी भेट देऊन पाहणी केली. पोलिसांनी जखमीला तातडीने उपचारासाठी जवळाबाजार येथील प्राथमिक आरोग्य केंद्रात दाखल केले. मात्र वैद्यकीय अधिकाऱ्यांनी तपासणी केल्यानंतर सदर व्यक्तीचा मृत्यू झाल्याची जाहीर केले. दरम्यान या अपघातातील मयत व्यक्तीचे नाव भगवान जांबुदे (३५ रा असोला तर्फे औढा) असे असल्याचे पोलिसांनी सांगितले. भगवान हे जवळाबाजार येथे शिलाई काम करत होते. रात्रीच्या वेळी काम आटोपून ते पायी असोला फाटा कडे निघाले असताना हा अपघात झाल्याचे पोलिसांनी सांगितले. सदरील वाहन जवळाबाजार येथील असल्याचेही पोलिसांनी सांगितले असून चालकाचा शोध सुरू करण्यात आला आहे याप्रकरणी रात्री उशिरापर्यंत गुन्हा दाखल झाला नव्हता.

from महाराष्ट्र | दिव्य मराठी https://ift.tt/7NQax9J