बाल रंगभूमीचा जल्लोष, 14 पासून राज्य नाट्य स्पर्धा:अमरावतीत 16 नाटकांचे सादरीकरण; दररोज एक प्रयोग

अमरावतीमध्ये बाल रंगभूमी परिषद आणि महाराष्ट्र शासनाच्या सांस्कृतिक कार्य संचालनालयामार्फत दोन महत्त्वाचे सांस्कृतिक कार्यक्रम आयोजित करण्यात आले आहेत. १० नोव्हेंबर रोजी 'जल्लोष लोककलेचा' हा एकदिवसीय कार्यक्रम होणार असून, त्यानंतर १४ नोव्हेंबरपासून ६४ व्या हौशी राज्य नाट्य स्पर्धेची विभागीय फेरी सुरू होईल. ही स्पर्धा डॉ. पंजाबराव देशमुख स्मृती वैद्यकीय महाविद्यालयाच्या छत्रपती श्री शिवाजी महाराज सभागृहात पार पडेल. बाल रंगभूमी परिषदेच्या स्थानिक शाखेतर्फे आयोजित 'जल्लोष लोककलेचा' हा कार्यक्रम नृत्य, वादन आणि गायनाचे संयुक्त सादरीकरण असणार आहे. हनुमान व्यायाम प्रसारक मंडळातील सोमेश्वर पुसतकर सभागृहात सकाळी १० वाजता सुरू होऊन सायंकाळी ६ वाजेपर्यंत हा कार्यक्रम चालेल. बाल रंगभूमी परिषदेचे स्थानिक अध्यक्ष मंगेश बक्षी यांनी ही माहिती दिली. महाराष्ट्र शासनाच्या सांस्कृतिक कार्य संचालनालयामार्फत आयोजित ६४ व्या हौशी राज्य नाट्य स्पर्धेची प्राथमिक फेरी अमरावती येथील छत्रपती श्री शिवाजी महाराज सभागृहात होणार आहे. अखिल भारतीय नाट्य परिषदेचे स्थानिक अध्यक्ष ॲड. चंद्रकांत डोरले आणि मध्यवर्ती संघटनेचे विश्वस्त ॲड. प्रशांत देशपांडे यांनी याबाबत माहिती दिली. ही स्पर्धा १४ ते २९ नोव्हेंबर या कालावधीत दररोज संध्याकाळी ७ वाजता एका प्रयोगासह सादर होईल. यंदा प्रथमच अतिशय सुसज्ज नाट्यगृहात नाटक सादर करता येणार असल्याने स्पर्धकांमध्ये मोठी उत्सुकता आहे, असे ॲड. डोरले यांनी सांगितले. रसिक प्रेक्षकांनाही या नाट्यगृहात उत्तम वातावरणात नाट्यानुभव घेता येईल. सांस्कृतिक कार्य मंत्री ॲड. आशिष शेलार आणि सांस्कृतिक कार्य विभागाचे सचिव डॉ. किरण कुलकर्णी यांच्या मार्गदर्शनाखाली ही स्पर्धा पार पडणार आहे. सांस्कृतिक कार्य विभागाचे संचालक विभीषण चवरे स्थानिक आयोजकांशी सतत संपर्कात आहेत. या स्पर्धेत एकूण १६ संघांचा सहभाग असून, जिल्ह्यातील काही संघही यात सहभागी होत आहेत. जास्तीत जास्त प्रेक्षकांनी उपस्थित राहून हौशी रंगकर्मींचा उत्साह वाढवावा, असे आवाहन आयोजकांनी केले आहे. राज्य नाट्य स्पर्धेच्या प्राथमिक फेरीत अमरावती केंद्रावर दरवर्षी अनेक दर्जेदार नाटकांचे सादरीकरण होते. यावर्षीही १६ नाटके सादर होतील. या फेरीत प्रथम आणि द्वितीय क्रमांकाची दोन नाटके अंतिम स्पर्धेत सहभागी होण्यासाठी निवडली जातील.

from महाराष्ट्र | दिव्य मराठी https://ift.tt/XZsUglo