पाकवर १५ वर्षांपासून वर्चस्व, आज भिडणार:१९ वर्षांखालील वर्ल्डकप, दुपारी १ वा. सामना; युवा विश्वचषकात सहा वर्षांनी भिडतील संघ

युवा विश्वचषकात सहा वर्षांनी भिडतील संघ रविवारी १९ वर्षांखालील विश्वचषकाच्या सुपर ६ फेरीतील शेवटच्या सामन्यात भारताचा सामना कट्टर प्रतिस्पर्धी पाकिस्तानशी होईल. बुलावायो मैदानावर हा सामना दुपारी १ वाजता सुरू होईल. प्रेक्षकांना तो जिओ-स्टार नेटवर्कवर थेट पाहता येईल. गट अ मधून ऑस्ट्रेलिया व अफगाणिस्तान आणि गट ब मधून इंग्लंड संघांनी आधीच उपांत्य फेरीसाठी पात्रता मिळवली आहे. या सामन्यात कट्टर प्रतिस्पर्धी उपांत्य फेरीतील चौथा व अंतिम संघ बनण्यासाठी झुंजताना दिसणार आहेत. भारतीय संघ पाकला पराभूत करत स्पर्धेतून बाहेर काढण्याचा शर्तीचा प्रयत्न करणार आहे. स्पर्धेच्या इतिहासात ६ वर्षांनी दोन्ही संघ एकमेकांशी खेळतील. या स्पर्धेत दोन्ही संघांनी ५-५ सामने जिंकले आतापर्यंत खेळलेल्या १० सामन्यांमध्ये दोन्ही संघांनी प्रत्येकी ५ विजय मिळवले. तसेच, २०१० पासून पाकिस्तानने या मोठ्या स्पर्धेत भारताला पराभूत केलेले नाही. यादरम्यान खेळलेले सर्व ४ सामने भारताने जिंकले. दोन्ही संघ शेवटचे २०२० मध्ये भिडले होते. जिथे भारताने पाकिस्तानला १० गडी राखून पराभूत केले होते. भारत एकूण युवा वनडे सामन्यांमध्ये १६-१२ असा आघाडीवर आहे. या सामन्याद्वारे बाद फेरीचा अंतिम संघ ठरणार स्पर्धेत त्यांचे चारही सामने जिंकल्याने भारतीय संघ पुढील फेरीत पोहोचणे जवळपास निश्चित मानले जात आहे. शेवटचे तीन सामने जिंकल्यानंतर, संघ गट ब मध्ये ६ गुणांसह आणि ३.३३७ च्या नेट रन-रेटसह दुसऱ्या स्थानी आहे. या सामन्यातील विजयामुळे टीम इंडिया गटातील अव्वल संघ म्हणून उपांत्य फेरीत प्रवेश करेल. दुसरीकडे, पाकिस्तान मागील सामन्यात इंग्लंडकडून पराभूत झाला. त्यांचे ४ गुण आणि नेट रन-रेट १.४८४ आहे. याचा अर्थ असा की उपांत्य फेरीत पोहोचण्यासाठी पाकिस्तानला फक्त एका विजयाची नाही तर मोठ्या विजयाची आवश्यकता असेल. अली रझा : १७ वर्षीय वेगवान गोलंदाजाने आतापर्यंत स्पर्धेत दुसऱ्या क्रमांकाचे सर्वाधिक १२ बळी घेतले. ४ सामन्यांत त्याने प्रत्येक १७ चेंडूंवर एक बळी घेतला व इकॉनॉमी रेट ३.५७ आहे. खेळाडूंत लढत : अभिज्ञान कुंडू :१७ वर्षीय यष्टिरक्षकाने स्पर्धेत भारतासाठी सर्वाधिक धावा केल्या, त्याने ३ डावांमध्ये १८३ धावा काढल्या. यादरम्यान त्याची सरासरी ९१.५० व त्याचा स्ट्राइक रेट ८५.११ आहे. भारत आशिया कपच्या फायनलमधील पराभवाचा घेणार बदला : या सामन्यात, भारताचे युवा खेळाडू डिसेंबरमध्ये झालेल्या आशिया कपच्या अंतिम सामन्यात झालेल्या पराभवाचा बदला घेण्याचे लक्ष्य ठेवतील. गत सामन्यात पाकिस्तानने भारताचा १९१ धावांनी पराभव करून आशिया कपचे विजेतेपद जिंकले होते.

from महाराष्ट्र | दिव्य मराठी https://ift.tt/Ve6qHmQ