मुंबईत बँक खाते उघडून परदेशात रोकड पाठवणारे 6 जण अटकेत:फसवणूक टोळीत 21 ते 32 वयोगटातील तरुणांचा सहभाग

सीबीआय अधिकारी किंवा वरिष्ठ पोलिस अधिकारी असल्याचे भासवून “डिजिटल अरेस्ट”च्या माध्यमातून ज्येष्ठ नागरिकांकडून कोट्यवधी रुपये उकळले जात आहेत. याप्रकरणी मुंबई पोलिसांनी राजस्थानमधून सहा जणांच्या टोळीला अटक केली आहे. विशेष म्हणजे २१ ते ३२ वयोगटातील हे आरोपी आहेत. या टोळीवर भारतात विविध १० ठिकाणी गुन्हे दाखल आहेत. गंगविशन जेताराम मांजू (३२), विकास मनोहरलाल बिष्णोई (२१), प्रेमसुख सोहनराम बिष्णोई (१९), रामनिवास रावलराम बिष्णोई (३२), सुनील मनोहरलाल बिष्णोई (२४), अजयकुमार मालाराम बिष्णोई (२१) अशी अटकेतील आरोपींची नावे आहेत. मुंबईत करंट बँक खाती उघडून त्यातून लाखो रुपयांमध्ये पैसे काढून यूएसडीटीमार्फत ती बाहेर देशात पाठवण्यात ही टोळी सक्रिय असल्याचे पोलिसांनी सांगितले. त्यामुळे या टोळीकडून आणखी माहिती उजेडात येण्याची शक्यता आहे. गेल्या महिनाभरापासून सायबर गुन्ह्यांमध्ये मोठ्या प्रमाणात वाढ झाली आहे. त्यातच गोरेगाव येथील दांपत्याला १ कोटी ३३ लाख रुपये, खारमधील एका व्यापाऱ्याला २ कोटी, तर एसबीआयमधून निवृत्त झालेल्या ६८ वर्षीय महिलेला ५०० कोटींच्या आर्थिक गैरव्यवहारात सहभाग सांगून सव्वा कोटी उकळण्यात आले. आयकर विभागातून निवृत्त ७४ वर्षीय वृद्धांना २५ लाखांचा गंडा घालण्यात आला आहे. कांदिवलीतील किरण नागरे यांना १२ डिसेंबरला एका अनोळखीने सीबीआय अधिकारी असल्याची ओळख देऊन मोबाइलवर व्हिडिओ कॉल केला. तुमचा मोबाइल क्रमांक विविध गुन्ह्यांमध्ये वापरण्यात आला असून हा मोबाइल क्रमांक बंद होणार आहे. तुमच्याविरोधात दिल्ली येथे गुन्हा दाखल असून अरेस्ट वॉरंट काढण्यात आले आहे. तुमचे बँक खाते बंद करण्याचे वॉरंट निघाले आहे. त्यानंतर त्यांना मोबाइलवर कोर्टाचे आणि रिझर्व्ह बँकेचे सही-शिक्के असलेली पीडीएफ पाठवून चौकशीच्या बहाण्याने त्यांचे बँक डिटेल्स जाणून घेतले. त्यांची ३२ लाखांची फसवणूक करण्यात आली. त्यानंतर विविध खात्यांत ही रक्कम वळती केल्याचे पोलिस तपासात निष्पन्न झाले. १५ डेबिट कार्ड, नामांकित बँकांचे १६ धनादेश, १० मोबाइल, १७ सिमकार्ड हस्तगत : पोलिसांनी अटकेतील आरोपींकडून गुन्ह्यात वापर करण्यात आलेले बेनिफिशरी बँक खाते, कोटक महिंद्रा बँक, चेंबूर शाखा या बँक खात्याचे धनादेश, डेबिट कार्ड आणि इतर वेगवेगळ्या नामांकित बँकांची १६ धनादेश पुस्तके, वेगवेगळ्या नामांकित बँकांचे १५ डेबिट कार्ड, वेगवेगळ्या कंपन्यांचे १० मोबाइल फोन, १७ सिमकार्ड आणि रोख रक्कम साडेतीन लाख असा मुद्देमाल जप्त केला. वृद्ध आणि महिला लक्ष्य डिजिटल अरेस्टमध्ये वयोवृद्ध आणि महिलांना फसवण्याचे प्रमाण अधिक आहे. डिजिटल अरेस्टचा नवीन प्रकार असल्याने अनेकांची फसवणूक होत आहे. डिजिटल अरेस्ट पोलिसांकडून केली जात नाही. अशा सायबर चोरट्यांपासून सावध राहण्यासाठी आपली कोणत्याही प्रकारची माहिती फोनवरून दुसऱ्या कुणाला देऊ नये. सर्वसामान्य नागरिकांनी कशालाही घाबरू नये, असे आवाहन पोलिसांनी केले आहे. तसेच ऑनलाइन युगात फसवणूक झाल्यास ऑफलाइन न जाता १९३० डायल करा आणि तुमची तक्रार त्वरित नोंदवा. डिजिटल अरेस्ट म्हणजे काय? डिजिटल अरेस्ट हा ऑनलाइन फसवणुकीमध्ये एक नवीन प्रकार आहे. यात पोलिस अधिकारी किंवा इतर प्रशासकीय अधिकारी असल्याचे भासवून फोनवरून व्यक्तीची चौकशी केली जाते. फोन केलेल्या व्यक्तीला सांगितले जाते की तुमच्यावर एखादा गुन्हा दाखल झाला आहे आणि तुम्ही अपराध केला आहे. यानंतर बनावट अधिकारी फोनवरून व्हॉट्सअॅप कॉलवरून बोलतात. त्यांना खोट्या गुन्ह्याची माहिती दिली जाते. कॅमेऱ्यासमोरून कुठेही जाऊ नका, चौकशी करून तुमचा जबाब नोंदवतोय, असे सांगून गंडवण्यात येते.

from महाराष्ट्र | दिव्य मराठी https://ift.tt/edmEWFC